نگراں وزیراعظم انوار الحق کاکڑ نے کہا ہے کہ پاکستان میں میڈیکل کی تعلیم کو عصر حاضر کے تقاضوں سے ہم آہنگ کیا جانا چاہیے۔
وہ منگل کو اسلام آباد میں میڈیکل ایجوکیشن اور مریضوں کی دیکھ بھال میں اسٹرٹیجک اصلاحات کے لیے ٹاسک فورس کے اجلاس کی صدارت کر رہے تھے۔
وزیراعظم نے کہا کہ افرادی قوت کی عالمی منڈی میں صحت کے شعبے کے ماہرین کی ضروریات کو پورا کرنے کے لیے صحت کے شعبے میں اصلاحات لائی جائیں۔ انہوں نے اس بات پر زور دیا کہ صحت کے شعبے کی موجودہ صورتحال میں اصلاحات کی ضرورت ہے۔ انہوں نے کہا کہ نرسنگ بہت اہم شعبہ ہے اور اس کی ترقی کے لیے مزید توجہ کی ضرورت ہے۔
وزارت صحت، کالج آف فزیشنز اینڈ سرجنز آف پاکستان، پاکستان میڈیکل اینڈ ڈینٹل کونسل، ہائر ایجوکیشن کمیشن اور ملک کی میڈیکل یونیورسٹیوں کے تعاون سے صحت کے شعبے میں اٹھائے گئے اقدامات پر بریفنگ دی گئی۔
Don’t forget to Subscribe our Youtube Channel & Press Bell Icon.
اجلاس کو صحت کے شعبے میں اصلاحات کے لیے تین مرحلوں پر مشتمل حکمت عملی کے بارے میں بتایا گیا۔ اس حکمت عملی کا مقصد صحت کے شعبے میں بین الاقوامی معیارات کے مطابق قواعد و ضوابط کے نفاذ کو یقینی بنانا ہے۔ صحت کے شعبے میں گریجویٹ اور پوسٹ گریجویٹ کی سطح پر اصلاحات کی حکمت عملی پر بھی بریفنگ دی گئی۔
وزیراعظم نے معاون خصوصی ڈاکٹر عامر بلال کی سربراہی میں صحت کے شعبے میں اصلاحات کے لیے ٹاسک فورس کے اقدامات کو سراہا۔
