وفاقی کابینہ نے 27ویں آئینی ترمیم کے مسودے کی منظوری دے دی ہے، جس کے بعد یہ ترمیم اب سینیٹ میں پیش کی جائے گی۔ وزیراعظم شہباز شریف نے آذربائیجان سے ویڈیو لنک کے ذریعے اجلاس کی صدارت کی۔
اجلاس میں وزیر دفاع خواجہ آصف، وزیر قانون اعظم نذیر تارڑ، اٹارنی جنرل منصور عثمان اعوان، رانا ثنا اللہ، مصدق ملک، ریاض حسین پیرزادہ، عون چوہدری، شزرہ منصب اور قیصر احمد شیخ سمیت دیگر وزرا شریک ہوئے۔ وزیر قانون نے کابینہ کو ترمیم کی تفصیلات پر بریفنگ دی جبکہ پیپلز پارٹی کی تجاویز کا بھی جائزہ لیا گیا۔
ذرائع کے مطابق 27ویں آئینی ترمیم کا بل آج سینیٹ کے اجلاس میں بطور ضمنی ایجنڈا پیش کیے جانے کا امکان ہے اور اسے سینیٹ کی قائمہ کمیٹی برائے قانون و انصاف کے سپرد کیا جائے گا۔ اجلاس اتوار تک جاری رہنے کا امکان ہے، جہاں ترمیم پر بحث کے بعد پیر کو منظوری متوقع ہے۔
ذرائع کے مطابق اپوزیشن جماعتیں ترمیم پیش کیے جانے کے موقع پر ایوان میں احتجاج کر سکتی ہیں۔
