آرمی چیف جنرل عاصم منیر نے کہا ہے کہ بلوچستان کی کامیابی پاکستان کی کامیابی ہے۔
بلوچستان کے ضلع آواران کے دورے کے موقع پر آرمی چیف نے کہا کہ پاکستان کے عوام کو بلوچستان کے بہادر لوگوں پر فخر ہے جو تمام مشکلات کے خلاف ڈٹ کر کھڑے رہے۔
انہوں نے کہا کہ پاکستان کی مسلح افواج اور قانون نافذ کرنے والے ادارے امن اور خوشحالی کے لیے بلوچستان کے عوام کی حمایت میں اپنی خدمات پیش کرتے رہیں گے۔
آرمی چیف نے شہدا ء کے مقامی عمائدین، کسانوں اور اہل خانہ سے بات چیت کی اور انہیں شہدا ءکی قربانیوں کو زبردست خراج تحسین پیش کرتے ہوئے ان کی سلامتی اور فلاح و بہبود کے لیے فوج کی جانب سے مسلسل حمایت کا یقین دلایا۔
آواران کے معززین اور کسانوں کے ساتھ بات چیت کرتے ہوئے، آرمی چیف نے زراعت کی اہمیت کو اُجاگر کیا۔
انہوں نے کہا کہ کسانوں کو آسان زرعی قرضوں کی فراہمی، بیج، کھاد، سولر ٹیوب ویل کی فراہمی اور ماہرین زراعت کی رہنمائی سمیت ہر قسم کی زرعی سہولیات فراہم کی جائیں گی تاکہ وہ اپنی زمینوں پر کاشت کرکے ترقی میں شراکت دار بن سکیں۔
بعد ازاں آرمی چیف نے کیڈٹ کالج آواران کا افتتاح کیا اور فیکلٹی ممبران اور طلباء سے بات چیت کی۔ آرمی چیف نے علاقے کے لوگوں کے لیے بلوچستان میں ایک اور کیڈٹ کالج کے قیام کو سراہا۔
انہوں نے اس عزم کا اعادہ کیا کہ پاک فوج متعلقہ سول محکموں کے ساتھ مل کر بلوچستان میں ترقیاتی اور امدادی سرگرمیاں جاری رکھے گی۔
قبل ازیں آمد پر کور کمانڈر بلوچستان کور نے آرمی چیف کا استقبال کیا۔
Don’t forget to Subscribe our Youtube Channel & Press Bell Icon.
