تہران: ایران کے نومنتخب صدر مسعود پزشکیان نے امریکہ کو خبردار کرتے ہوئے کہا ہےکہ امریکا کو یہ حقیقت سمجھ لینی چاہیے کہ ایران دباؤ میں ہر گز نہیں آئے گا۔
عرب میڈیا رپورٹ کے مطابق ایرانی روزنامے میں شائع ہونے والے ایک بیان میں پزشکیان نے باور کرایا کہ ایران جوہری ہتھیار حاصل کرنے کی کوشش نہیں کر رہا ہے۔
انہوں نے کہا کہ امریکا کو حقیقت کا ادراک کرنا چاہیے، اسے ایک ہی مرتبہ ہمیشہ کے لیے یہ بات سمجھ لینی چاہیے کہ ایران کسی طور دباؤ کا جواب نہیں دے گا اور ایران کے دفاعی نظریے میں جوہری ہتھیار شامل نہیں۔
ایران کا صدر منتخب ہونے والے 69 سالہ ہارٹ سرجن مسعود پزشکیان نے عملی خارجہ پالیسی مضبوط بنانے کا عزم ظاہر کیا ہے۔
انہوں نے یہ بھی کہا کہ وہ بڑی قوتوں کے ساتھ اس وقت رکے ہوئے مذاکرات کے حوالے سے کشیدگی کم کریں گے تا کہ 2015 کے جوہری معاہدے کو پھر سے زندہ کیا جا سکے۔
پزشکیان نے اپنے بیان میں کہا ہے کہ چین اور روس مشکل وقتوں میں مسلسل ہمارے ساتھ کھڑے رہے، ہم اس دوستی کو انتہائی گراں قدر سمجھتے ہیں۔
Don’t forget to Subscribe our Youtube Channel & Press Bell Icon.
