سابق وفاقی وزیر داخلہ شیخ رشید احمد کو بیرونِ ملک روانگی سے روک دیا گیا۔ انہیں اسلام آباد انٹرنیشنل ایئرپورٹ پر امیگریشن حکام نے روک کر آگے جانے کی اجازت نہیں دی۔
لاہور ہائی کورٹ کے راولپنڈی بینچ نے چند روز قبل شیخ رشید کا نام پاسپورٹ کنٹرول لسٹ اور پی این آئی ایل سے نکالنے کا حکم جاری کیا تھا۔
شیخ رشید کے مطابق جسٹس صداقت علی خان نے انہیں عمرہ ادائیگی کے لیے بیرونِ ملک جانے کی اجازت دی تھی اور عدالتی احکامات کی نقول متعلقہ اداروں کو بھی فراہم کی گئی تھیں۔
انہوں نے مزید کہا کہ عدالت نے واضح طور پر ہدایت کی تھی کہ ان کے سفر میں کوئی رکاوٹ نہ ڈالی جائے، لیکن جب وہ ایئرپورٹ پہنچے تو انہیں بتایا گیا کہ وہ سفر نہیں کر سکتے۔ شیخ رشید نے کہا کہ وہ اس معاملے پر توہینِ عدالت کی درخواست دوبارہ جسٹس صداقت علی خان کی عدالت میں دائر کریں گے۔
سابق وزیر داخلہ کا کہنا تھا کہ “جس ملک میں ہائی کورٹ کے فیصلے پر عمل نہ ہو، وہاں انسان بس آسمان کی طرف ہی دیکھ سکتا ہے۔ اللہ مجھے عمرہ کرائے گا اور وہ اپنے فیصلے پر شرمندہ بھی ہوں گے۔”
