سابق وزیراعظم عمران خان نے کہا ہے کہ طاقتور قوتوں نے کوئی سبق نہیں سیکھا اور آج بھی سیاسی انجینئرنگ ہورہی ہے۔
کراچی میں خواتین کنونشن سے ویڈیو لنک کے ذریعے خطاب میں عمران خان کا کہنا تھاکہ ملک کی تاریخ میں ایسے وقت آتے ہیں جسے تاریخ فیصلہ کن وقت کہتی ہے اور آج پاکستان کی تاریخ کا سب سے بڑا بحران ہے، ایک آدمی کے فیصلے سے وہ بحران آیا جس کی پیش گوئی میں نے7 ماہ پہلےکردی تھی۔
مزید پڑھیں: https://republicpolicy.com/imran-khan-ki-general-bajwa-par-2/
انہوں نے کہا کہ ہم آج جس جگہ کھڑے ہوئے ہیں اس میں جنرل (ر) قمر جاوید باجوہ کا ہاتھ ہے، بدقسمتی سے طاقتور قوتوں نے ماضی سے سبق نہیں سیکھا، آج بھی سیاسی انجینئرنگ ہورہی ہے، ایم کیو ایم کو اکٹھا کیا جارہا ہے، بلوچستان عوامی پارٹی (باپ) کو پیپلزپارٹی میں دھکیلا جارہا ہے اور جنوبی پنجاب میں امیدواروں کو ان کے فون آ رہے ہیں کہ پیپلزپارٹی کو مضبوط کریں۔
سابق وزیراعظم کا کہنا تھاکہ طاقور قوتوں خدا کے واسطے سیاسی انجینئرنگ نہ کریں، شفاف الیکشن اور مضبوط حکومت کے قیام کے علاوہ اس مصیبت کے ہٹنے کا کوئی راستہ نہیں ہے۔
ان کا کہنا تھاکہ 90 کی دہائی سے پہلے پاکستان بہت آگے تھا، جب یہ کرپٹ خاندان اوپر بیٹھا تو 90 کی دہائی کے بعد بھارت ہم سے آگے نکل گیا، آج پاکستان تاریخ کے سب سے بڑے بحران سے گزررہا ہے۔
