امریکی محکمہ خارجہ نے کہا ہے کہ ڈونلڈ ٹرمپ کے انتخابات جیتنے پر بانی پی ٹی آئی عمران خان کی رہائی کی بات میں کوئی صداقت نہیں۔
امریکی محکمہ خارجہ کے ترجمان ملر کی پریس بریفنگ میں صحافی نے سوال کیا کہ پی ٹی آئی رہنما لطیف کھوسہ نے کہا ہے کہ ٹرمپ انتخابات جیتے تو بانی پی ٹی آئی رہا ہو جائیں گے، جس پر ملر نے کہا کہ میں کتنی بار کہوں کہ یہ سچ نہیں ہے۔
ان کا مزید کہنا تھا کہ سابق وزیراعظم کیخلاف قانونی کارروائیاں پاکستانی عدالتوں کا معاملہ ہے، سابق وزیراعظم کے الزامات سے متعلق فیصلہ پاکستانی عدالتوں نے کرنا ہے۔
ملر نے کہا کہ ہم کئی بار کہہ چکے ہیں بانی پی ٹی آئی کو ہٹانے میں امریکا کا کردار نہیں، پاکستان کی سیاست پاکستانی عوام کیلئے ہے۔
