روسی حملے کو ناکام بناتے ہوئے یوکرین کا ایف 16 لڑاکا طیارہ گر کر تباہ ہوگیا، یوکرین کی فوج کی جانب سے طیارہ تباہ ہونے کی تصدیق کر دی گئی۔
یہ امریکی ساختہ طیاروں کی ملک میں آمد کے بعد اس طرح کا پہلا نقصان ہے۔
بین الاقوامی خبر رساں ادارے کی رپورٹ کے مطابق یوکرین کی فوج کا کہنا ہے کہ ایف 16 طیارے کا پائلٹ بھی ہلاک ہوگیا، طیارے کا روسی حملے کو ناکام بنانے کے دوران رابطہ منقطع ہوا تھا۔
یوکرینی فوج نے اپنے بیان میں کہا کہ ایف 16 طیارے نے روس کے 4 کروز میزائل مار گرائے تھے، ایف 16 طیارہ دشمن کے اگلے ہدف کی جانب بڑھ رہا تھا تو اس دوران رابطہ منقطع ہوا۔
یوکرین نے بیان میں کہا کہ ایک جہاز اپنے اگلے ہدف کی جانب جاتے ہوئے لاپتا ہوگیا تھا لیکن بعد میں واپس آیا تاہم اب ایف-16 گرکر تباہ ہوا اور پائلٹ بھی مارا گیا۔
امریکا کے وزرات دفاع کے حکام نے بیان میں کہا کہ یوکرین میں ایف-16 طیارہ پیر کو گر کر تباہ ہوا تھا اور یہ روس کے فائر کی وجہ سے نہیں گرا تھا اور ممکنہ طور پر پائلٹ کی غلطی کی وجہ سے حادثہ ہوا ہے تاہم اس کی تحقیقات کی جا رہی ہیں۔
