پاکستان ٹیلی کمیونیکیشن اتھارٹی نے سیلولر موبائل آپریٹرز سے مشاورت کے بعد ای سم کی خدمات سے متعلق چارجز میں تبدیلی کردی ہے۔ نئی پالیسی کے تحت ای سم جاری کرنے کی ابتدائی فیس زیادہ سے زیادہ 1,500 روپے مقرر کی گئی ہے، جبکہ صارفین کو ہم آہنگ موبائل فونز کے درمیان ای سم منتقل کرنے کی 10 مرتبہ تک مفت سہولت فراہم کی جائے گی۔ نئی پالیسی اگست 2026 کے وسط تک نافذ العمل ہوجائے گی۔
یہ اقدام پارلیمانی کمیٹی کی ہدایات کی روشنی میں کیا گیا ہے، جس نے ٹیلی کمیونیکیشن ریگولیٹر کو ای سم منتقلی کی نظرثانی شدہ پالیسی مرتب کرنے کی ہدایت کی تھی۔ اس کا مقصد ای سم ٹیکنالوجی کو صارفین کے لیے زیادہ آسان بنانا اور انہیں بار بار صارف خدمات مراکز کے چکر لگانے سے بچانا ہے۔
پی ٹی اے کے مطابق موجودہ نظام کے تحت بھی صارفین ایک ہی کیو آر کوڈ کے ذریعے اپنی ای سم ایک موبائل فون سے دوسرے موبائل فون میں مخصوص تعداد میں منتقل کرسکتے ہیں، جس کے لیے ابتدائی خریداری اور فعال کرنے کے وقت کوڈ جاری کیا جاتا ہے اور مقررہ حد تک منتقلی پر اضافی فیس عائد نہیں کی جاتی۔
تاہم سیلولر موبائل آپریٹرز سے مشاورت کے بعد پی ٹی اے نے چارجز کے ڈھانچے کو باقاعدہ طور پر تبدیل کرتے ہوئے ای سم جاری کرنے کی زیادہ سے زیادہ ابتدائی فیس 1,500 روپے مقرر کردی ہے۔ اس کے علاوہ ایک صارف کو 10 مختلف ہم آہنگ آلات کے درمیان ای سم منتقل کرنے کی مفت سہولت حاصل ہوگی۔
پارلیمانی کمیٹی نے پی ٹی اے کو یہ ہدایت بھی دی تھی کہ ایسا محفوظ ڈیجیٹل نظام وضع کیا جائے جس کے ذریعے صارفین صارف خدمات مراکز کا رخ کیے بغیر اپنی ای سم ہم آہنگ آلات کے درمیان منتقل کرسکیں، جبکہ اس عمل میں مضبوط حفاظتی معیار برقرار رکھا جائے۔
دوسری جانب پی ٹی اے نے کمیٹی کو بتایا ہے کہ وہ نادرا اور سیلولر موبائل آپریٹرز کے ساتھ مل کر صارفین کی تصدیق کے لیے کثیر سطحی نظام متعارف کرانے پر کام کررہا ہے، جس کا مقصد سم کے اجرا اور ملکیت کی تصدیق کو مزید محفوظ بنانا ہے۔
اس سلسلے میں دو تجاویز زیر غور ہیں۔ پہلی تجویز کے تحت نادرا اس امر کا جائزہ لے رہا ہے کہ اپنی پاک شناخت موبائل ایپ کے ذریعے چہرے کی شناخت کی ٹیکنالوجی استعمال کرتے ہوئے سم جاری کرنے کی سہولت فراہم کی جائے۔ اس سے اہل صارفین گھر بیٹھے اپنی شناخت کی تصدیق مکمل کرسکیں گے اور جسمانی بایومیٹرک تصدیق کی ضرورت کم ہوجائے گی۔
دوسری تجویز کے تحت سیلولر موبائل آپریٹرز اپنی موبائل ایپس کے ذریعے خودکار بایومیٹرک تصدیق کی سہولت فراہم کریں گے، جس میں صارفین آپریٹرز کی ایپس کے ذریعے نادرا کے نظام سے اپنی شناخت کی تصدیق کراسکیں گے اور سم کے اجرا سمیت متعلقہ خدمات حاصل کرسکیں گے۔
