فیلڈ مارشل سید عاصم منیر نے قصور سیکٹر اور جلال پور پیروالا، ملتان میں قائم فلڈ ریلیف کیمپس کا دورہ کیا۔
آئی ایس پی آر کے مطابق اس موقع پر انہوں نے حالیہ سیلابی صورتحال اور جاری امدادی سرگرمیوں کا جائزہ لیا۔ دورے کا مقصد سول انتظامیہ اور فوج کے درمیان مربوط تعاون کو مزید مؤثر بنانا تھا تاکہ متاثرہ عوام کو بروقت اور جامع امداد فراہم کی جا سکے۔ چیف سیکرٹری پنجاب سمیت سول انتظامیہ کے اعلیٰ حکام بھی موجود تھے جبکہ آرمی چیف کو زمینی صورتحال اور ریلیف آپریشنز پر تفصیلی بریفنگ دی گئی۔
فیلڈ مارشل عاصم منیر نے سول انتظامیہ کے ساتھ گفتگو کرتے ہوئے بہتر طرزِ حکمرانی اور عوام دوست ترقیاتی اقدامات کی ضرورت پر زور دیا۔ انہوں نے کہا کہ بنیادی ڈھانچے کی ترقی اور دیگر تمام اقدامات کو ترجیحی بنیادوں پر مکمل کیا جائے تاکہ بار بار آنے والے سیلابوں کے نقصانات سے عوام کو محفوظ بنایا جا سکے، کیونکہ ریاست ہر سال جان و مال کے بڑے نقصان کی متحمل نہیں ہو سکتی۔
آرمی چیف نے متاثرہ افراد سے بھی ملاقات کی، جنہیں پاک فوج اور سول انتظامیہ نے کامیابی سے محفوظ مقامات تک منتقل کیا تھا۔ متاثرین نے مشکل وقت میں بروقت مدد پر فوج کا شکریہ ادا کیا۔
دورے کے دوران فیلڈ مارشل نے ریلیف آپریشن میں مصروف فوجی جوانوں، 1122 اہلکاروں اور پولیس افسران سے بھی ملاقات کی۔ انہوں نے ان کے عزم، آپریشنل تیاری اور مسلسل کاوشوں کو سراہا اور کہا کہ عوام کی خدمت کے لیے سول انتظامیہ کے ساتھ قریبی رابطے میں ان کی خدمات قابلِ تعریف ہیں۔
اس موقع پر فیلڈ مارشل عاصم منیر نے لاہور–قصور اور ملتان–جلال پور پیروالا کے سیلاب زدہ علاقوں کا فضائی معائنہ بھی کیا تاکہ نقصانات کے حجم اور امدادی سرگرمیوں کا براہِ راست جائزہ لیا جا سکے۔ قبل ازیں لاہور اور ملتان آمد پر مقامی کور کمانڈرز نے ان کا استقبال کیا۔
