سانحہ 9 مئی کے زمان پارک واقعے میں پولیس کی گاڑیاں جلانے کے مقدمے پر انسدادِ دہشت گردی عدالت نے گواہوں کو طلب کر لیا۔
انسداد دہشت گردی عدالت کے ایڈمن جج منظر علی گل کے روبرو کیس کی سماعت ہوئی، جس میں عدالت نے پراسیکیوشن کے گواہوں کو آئندہ سماعت پر شہادت ریکارڈ کرانے کے لیے طلب کیا۔ سماعت کے دوران عدالتی عملے نے جیل میں موجود ملزمان کی حاضری مکمل کی، جن میں ڈاکٹر یاسمین راشد، عمر سرفراز چیمہ، اعجاز چوہدری اور میاں محمود الرشید شامل ہیں۔ ملزمان کی جانب سے رانا مدثر عمر اور میاں علی عمار ایڈووکیٹ عدالت میں پیش ہوئے۔
بعد ازاں عدالت نے مقدمے کے جیل ٹرائل کی کارروائی کل تک ملتوی کر دی۔
واضح رہے کہ تھانہ ریس کورس میں زمان پارک واقعے میں پولیس کی گاڑیاں جلانے کا مقدمہ درج ہے، جس میں پی ٹی آئی رہنماؤں پر الزام ہے کہ انہوں نے کارکنان کو 9 مئی کے واقعات کے دوران بغاوت اور فسادات پر اکسانے میں کردار ادا کیا۔
دوسری جانب سانحہ 9 مئی کے مقدمات میں زیرِ حراست پی ٹی آئی رہنماؤں کی ضمانت کی درخواستوں پر سماعت عدالت نے 8 نومبر تک ملتوی کر دی اور وکلا و پراسیکیوشن دونوں کو آئندہ سماعت پر دلائل دینے کی ہدایت کی۔
