اسلام آباد کی ایڈیشنل ڈسٹرکٹ اینڈ سیشن کورٹ کے جج محمد افضل مجوکہ نے 9 مئی اور دیگر پانچ مقدمات میں عمران خان اور بشریٰ بی بی کے خلاف درخواست ضمانت کی سماعت کی۔ عدالت نے دونوں کو 23 دسمبر تک گرفتار کرنے سے روک دیا اور ان کی قبل از گرفتاری ضمانت میں توسیع کر دی۔
عدالت کے مطابق بشریٰ بی بی کی ایک جبکہ عمران خان کی چھ مقدمات میں عبوری ضمانتوں میں بھی توسیع کر دی گئی ہے۔ عدالت نے ہدایت کی ہے کہ اگلی سماعت پر عمران خان کو عدالت میں یا ویڈیو لنک کے ذریعے پیش کیا جائے۔
عمران خان کی عدم دستیابی کے باعث ان کی ضمانت کی درخواستوں پر دلائل مکمل نہ ہو سکے اور عدالت نے سماعت 23 دسمبر تک ملتوی کر دی۔
یہ امر قابل ذکر ہے کہ عمران خان کے خلاف 9 مئی واقعات، اقدام قتل اور مبینہ جعلی رسیدوں سمیت متعدد مقدمات درج ہیں جبکہ بشریٰ بی بی کے خلاف بھی جعلی رسیدیں جمع کروانے کے الزام میں مقدمہ زیر سماعت ہے۔
