کینیڈا کے وزیرِ اعظم مارک کارنی نے واضح کیا ہے کہ کینیڈا چین کے ساتھ کسی بھی قسم کا آزاد تجارتی معاہدہ کرنے کا ارادہ نہیں رکھتا۔
ان کے بیان کا پس منظر امریکی صدر ڈونلڈ ٹرمپ کی اس دھمکی ہے جس میں انہوں نے کہا تھا کہ اگر کینیڈا نے چین کے ساتھ فری ٹریڈ معاہدہ کیا تو امریکا کینیڈا سے آنے والی مصنوعات پر 100 فیصد ٹیرف عائد کر دے گا۔
مارک کارنی نے کہا کہ چین کے ساتھ حالیہ سمجھوتا کوئی فری ٹریڈ ڈیل نہیں بلکہ صرف چند مخصوص شعبوں میں ٹیرف میں کمی سے متعلق ہے، جو پچھلے سالوں میں اضافی محصولات کے تحت آئے تھے۔
انہوں نے واضح کیا کہ امریکا، میکسیکو اور کینیڈا کے درمیان موجود تجارتی معاہدے کے تحت غیر مارکیٹ معیشت کے ساتھ فری ٹریڈ معاہدہ کرنے سے پہلے امریکا کو مطلع کرنا ضروری ہے، اور کینیڈا چین کے ساتھ ایسا کوئی معاہدہ نہیں کر رہا۔
ادھر امریکی صدر ٹرمپ نے سوشل میڈیا پر دعویٰ کیا کہ چین کینیڈا پر اثر و رسوخ بڑھا رہا ہے اور خبردار کیا کہ کینیڈا کو امریکا کے لیے چینی مصنوعات کا راستہ بنانے کی اجازت نہیں دی جائے گی۔ امریکی وزیرِ خزانہ اسکاٹ بیسنٹ نے بھی کہا کہ امریکا نہیں چاہتا کہ چین کی سستی اشیا کینیڈا کے ذریعے امریکی منڈی میں آئیں۔
یاد رہے کہ 2024 میں کینیڈا نے امریکا کی پیروی کرتے ہوئے چینی الیکٹرک گاڑیوں پر 100 فیصد اور اسٹیل و ایلومینیم پر 25 فیصد ٹیرف عائد کیے تھے، جس کے جواب میں چین نے کینیڈا کی کینولا آئل، سور اور سی فوڈ مصنوعات پر بھاری محصولات لگا دیے۔
حالیہ دنوں میں کینیڈا نے چینی الیکٹرک گاڑیوں پر ٹیرف میں جزوی نرمی کی ہے، تاہم حکومت کا موقف ہے کہ یہ اقدام محدود اور مشروط ہے اور اسے آزاد تجارتی معاہدہ قرار نہیں دیا جا سکتا۔
