اسلام آباد: پاکستان نے رجسٹرڈ افغان مہاجرین کے قیام میں ایک سال کی توسیع کر دی۔
یہ منظوری بدھ کو اسلام آباد میں وزیراعظم شہباز شریف کی زیر صدارت وفاقی کابینہ کے اجلاس میں دی گئی۔
کابینہ نے ملک میں قانونی طور پر مقیم 1.45 ملین افغان مہاجرین اور جن کے پی او آر کارڈز کی میعاد گزشتہ ماہ ختم ہو گئی تھی، کے لیے پروف آف رجسٹریشن (پی او آر) کارڈز کی مدت میں ایک سال کی توسیع کی منظوری دی۔ پی او آر کارڈز میں اگلے سال 30 جون تک توسیع دی گئی ہے۔
اجلاس میں وفاقی کابینہ نے پاکستان پبلک ورکس ڈیپارٹمنٹ (پی ڈبلیو ڈی) کو ختم کرنے کی منظوری دے دی ہے۔
منظور شدہ منصوبے کے تحت اثاثہ اور سہولت مینجمنٹ کمپنی قائم کی جائے گی تاکہ پاک پی ڈبلیو ڈی کو پہلے تفویض کیے گئے دیکھ بھال اور مرمت کے کاموں کو جاری رکھا جا سکے۔ گریڈنگ اور گولڈن ہینڈ شیک اسکیم کے نفاذ کے بعد اس کے عملے کو متعلقہ وزارتوں میں منتقل کردیا جائے گا۔
وفاقی ترقیاتی منصوبوں کی نگرانی کے لیے پاکستان انفراسٹرکچر ڈویلپمنٹ کمپنی قائم کی جائے گی جبکہ وفاقی حکومت کی زیر نگرانی تمام صوبائی ترقیاتی منصوبے متعلقہ صوبائی اداروں کے حوالے کیے جائیں گے۔
کابینہ نے ہدایت کی کہ منتقلی کا تمام عمل دو ہفتوں میں مکمل کیا جائے۔
کابینہ کو وزیر خزانہ کی زیر صدارت کمیٹی کی جانب سے حکومتی حجم کو کم کرنے کے حوالے سے ہونے والی پیش رفت کے بارے میں بریفنگ دی گئی۔
Don’t forget to Subscribe our Youtube Channel & Press Bell Icon.
