خضدار: صوبہ بلوچستان کے شہر خضدار میں اتوار کی شب ایک دھماکے میں دو افراد ہلاک اور پانچ زخمی ہو گئے۔
تفصیلات کے مطابق خضدار میں عمر فاروق چوک کے قریب دھماکا ہوا۔ دھماکے کے بعد پولیس اور لیویز کے اہلکار علاقے میں پہنچ گئے اور علاقے کو گھیرے میں لے کر امدادی کارروائی شروع کردی۔
جاں بحق اور زخمیوں کو ڈسٹرکٹ ہیڈ کوارٹر ہسپتال خضدار منتقل کر دیا گیا۔
ڈپٹی کمشنر خضدار کے مطابق یہ دیسی ساختہ بم دھماکہ تھا جو عمر فاروق چوک پر ایک مارکیٹ کے قریب کھڑی موٹر سائیکل میں نصب کیا گیا تھا۔
وزیراعلیٰ بلوچستان سرفراز نے خضدار دھماکے کی شدید مذمت کرتے ہوئے قیمتی جانوں کے ضیاع پر دکھ کا اظہار کیا ہے۔ انہوں نے محکمہ صحت کے حکام کو زخمیوں کو علاج معالجے کی بہترین سہولیات فراہم کرنے کی بھی ہدایت کی۔
انہوں نے واقعے کو وحشیانہ کارروائی قرار دیتے ہوئے کہا کہ اس طرح کے حملوں سے پاکستانی عوام کے حوصلے پست نہیں کیے جا سکتے۔
انہوں نے کہا کہ قوم کا اتحاد ملک میں امن کو خراب کرنے کی ایسی تمام کوششوں کو ناکام بنائے گا، انہوں نے مزید کہا کہ اس غیر انسانی اور بزدلانہ فعل میں ملوث عناصر کو جلد انصاف کے کٹہرے میں لایا جائے گا کیونکہ قانون نافذ کرنے والے ادارے دہشت گردوں کی گرفتاری کے لیے ہر ممکن کوششیں کر رہے ہیں۔
Don’t forget to Subscribe our Youtube Channel & Press Bell Icon.
