پشاور: پاکستان تحریک انصاف کی کور کمیٹی کا ہنگامی اجلاس اتوار کو پشاور میں ہوا جس میں وزیر اعلیٰ خیبر پختونخوا علی امین گنڈا پور نے بھی شرکت کی۔
تحریک انصاف کی کور کمیٹی کے ارکان نے خیبرپختونخوا میں آپریشن ’عزمِ استحکام‘ کی مخالفت کی۔ وزیراعلیٰ گنڈا پور نے اراکین کو صوبے میں متوقع آپریشن کے بارے میں بریفنگ دی۔
گنڈا پور نے کور کمیٹی کے سامنے خیبرپختونخوا میں دہشت گردی کے خلاف جاری آپریشن عزمِ استحکام کے حوالے سے اپنے خیالات پیش کئے۔
وزیراعلیٰ نے بریفنگ دیتے ہوئے کہا کہ خیبرپختونخوا میں آپریشن کے حوالے سے کسی اجلاس میں کوئی فیصلہ نہیں کیا گیا اور کہا کہ آپریشن کے حوالے سے کوئی فیصلہ ہوا ہے تو اس اجلاس کے منٹس سامنے لائے جائیں۔
انہوں نے کہا کہ میں نے بطور وزیر اعلیٰ خیبرپختونخوا جن اجلاسوں میں شرکت کی ان میں صرف صوبے میں دہشت گردی کے واقعات سے متعلق بات چیت ہوئی۔ انہوں نے کہا کہ صوبے میں کوئی آپریشن شروع کرنے کے حوالے سے کوئی فیصلہ نہیں کیا گیا اور مزید کہا کہ کے پی ایک اور آپریشن کا متحمل نہیں ہو سکتا۔
گنڈا پور نے کور کمیٹی کو بتایا کہ آپریشن عزمِ استحکام کے بارے میں کوئی فیصلہ ہوا تو سب سے پہلے کور کمیٹی کو آگاہ کریں گے۔ انہوں نے کہا کہ خیبرپختونخوا دہشت گردی سے سب سے زیادہ متاثر صوبہ ہے۔
وزیراعلیٰ نے بتایا کہ وہ بہت جلد پی ٹی آئی کے بانی عمران خان سے بھی اس معاملے پر بات کریں گے۔ کور کمیٹی نے گنڈا پور پر اعتماد کا اظہار کیا۔
Don’t forget to Subscribe our Youtube Channel & Press Bell Icon.
