پاک بھارت معاملات بہت قریب سے دیکھ رہے ہیں ، امریکہ

مقبوضہ کشمیر میں پہلگام واقعے کے بعد پاکستان اور بھارت کے درمیان کشیدگی پر امریکا کا ردعمل سامنے آ گیا۔ 

امریکی محکمہ خارجہ کی ترجمان ٹیمی بروس نے پریس بریفنگ میں کہا کہ پاک بھارت معاملات کو بہت قریب سے دیکھ رہے ہیں، جموں و کشمیر کے معاملے پر فوری طور پر کوئی پوزیشن نہیں لے رہے، دونوں ممالک کے درمیان صورتحال تیزی سے تبدیل ہو رہی ہے۔

ٹیمی بروس نے مزید کہا کہ پہلگام واقعے کی مذمت کرتے ہیں، حملے میں ملوث عناصر کو انصاف کے کٹہرے میں لایا جائے گا۔

ان کا کہنا تھا کہ ہم ان لوگوں کے لیے دعا گو ہیں جن کے عزیز اس واقعہ میں مارے گئے اور زخمی افراد کے جلد صحت یاب ہونے کیلئے دعا گو ہیں۔