پشاور میں ایک بڑے عوامی اجتماع سے خطاب کرتے ہوئے وزیراعلیٰ خیبر پختونخوا سہیل آفریدی نے خود کو احتجاجی سیاست کا نمایاں علمبردار قرار دیا اور کہا کہ وہ اپنے مؤقف پر ابتدا ہی سے قائم ہیں۔ انہوں نے دعویٰ کیا کہ ان کی جماعت کے مینڈیٹ کو تسلیم نہیں کیا گیا اور عوام کے ووٹ کا حق متاثر ہوا ہے۔
انہوں نے کہا کہ وہ صوبے کے کروڑوں شہریوں کی نمائندگی کر رہے ہیں اور اسی ذمہ داری کے تحت آواز بلند کر رہے ہیں۔ ان کا کہنا تھا کہ اس سلسلے میں عدلیہ اور اسپیکر کو بھی خطوط ارسال کیے گئے، تاہم انہیں اپنے قائد سے ملاقات کی اجازت نہیں دی جا رہی۔
وزیراعلیٰ نے وفاقی حکومت پر سخت تنقید کرتے ہوئے کہا کہ ان کے ساتھ امتیازی سلوک روا رکھا جا رہا ہے، حتیٰ کہ ان کا پاسپورٹ بھی معطل کر دیا گیا، جبکہ دوسری جانب پنجاب کی قیادت کے لیے بھاری اخراجات کیے جا رہے ہیں۔
انہوں نے مزید واضح کیا کہ موجودہ تحریک کا مقصد بانی پی ٹی آئی کی رہائی ہے اور اس حوالے سے خیبر پختونخوا میں ایک مقام کا تعین کیا جائے گا، جہاں وہ اور دیگر منتخب نمائندے حلف لے کر آئندہ لائحہ عمل کا اعلان کریں گے۔
