امریکی نائب صدر جے ڈی وینس نے وزیرِ اعظم شہباز شریف سے اہم ملاقات کی، جس میں دوطرفہ اور علاقائی معاملات پر تفصیلی گفتگو کی گئی۔
سرکاری اعلامیے کے مطابق اس ملاقات میں خطے کی مجموعی صورتحال، امن و استحکام اور باہمی تعاون کے امکانات پر سنجیدہ تبادلہ خیال ہوا۔ امریکی نائب صدر کے ہمراہ خصوصی ایلچی اسٹیو وٹکوف اور جیرڈ کشنر بھی موجود تھے۔
ملاقات کے دوران دونوں ممالک نے اس امر پر اتفاق کیا کہ خطے میں دیرپا امن کے قیام کے لیے مشترکہ کوششیں ناگزیر ہیں۔ پاکستان نے ایک بار پھر اس عزم کا اعادہ کیا کہ وہ امن کے فروغ کے لیے اپنی سفارتی اور سہولت کاری کی کوششیں جاری رکھے گا۔
وزیرِ اعظم شہباز شریف نے ایران اور امریکا کے درمیان جاری مذاکرات کو مثبت اور تعمیری پیشرفت قرار دیتے ہوئے کہا کہ یہ عمل خطے میں پائیدار امن کے قیام کی جانب اہم قدم ثابت ہو سکتا ہے۔ انہوں نے امید ظاہر کی کہ ان مذاکرات کے نتیجے میں دونوں ممالک کے درمیان اعتماد اور تعاون میں اضافہ ہوگا۔
وزیرِ اعظم نے اس بات پر زور دیا کہ پاکستان خطے میں مستقل امن کے قیام کے لیے اپنی ذمہ دارانہ کوششیں جاری رکھے گا۔
اعلامیے کے مطابق اس موقع پر نائب وزیرِ اعظم اسحاق ڈار اور وزیرِ داخلہ محسن نقوی بھی وزیرِ اعظم کے ہمراہ شریک تھے۔
