پاکستان نے کویت کی جانب سے دو ہزار تئیس میں طے پانے والے پاکستان۔کویت دفاعی تعاون کے معاہدے کی توثیق کا خیرمقدم کرتے ہوئے اسے دونوں ممالک کے دیرینہ دفاعی تعلقات کو مزید مضبوط بنانے کی جانب ایک اہم پیش رفت قرار دیا ہے۔
بدھ کے روز ذرائع ابلاغ کے سوالات کے جواب میں دفتر خارجہ کے ترجمان طاہر اندرابی نے کہا کہ معاہدے کی توثیق اس بات کا واضح اظہار ہے کہ پاکستان اور کویت دفاعی تعاون کو مزید فروغ دینے اور اپنے سکیورٹی تعلقات کو نئی وسعت دینے کے لیے پرعزم ہیں۔
انہوں نے کہا کہ دونوں برادر ممالک کے درمیان دفاعی تعاون کی بنیاد انیس سو اسی کی دہائی سے موجود ہے، جبکہ یہ معاہدہ مختلف شعبوں میں تعاون کو منظم اور مؤثر انداز میں آگے بڑھانے کے لیے ایک جامع ادارہ جاتی فریم ورک فراہم کرے گا۔
ترجمان کے مطابق معاہدے میں عسکری تربیت، پیشہ ورانہ تعلیم، مشترکہ فوجی مشقیں، مہارتوں اور تجربات کا تبادلہ، اور دیگر باہمی اتفاق سے طے پانے والے شعبہ جات میں تعاون شامل ہے۔
انہوں نے کہا کہ اس معاہدے کے ذریعے دونوں ممالک کی مسلح افواج کے درمیان ادارہ جاتی روابط مزید مستحکم ہوں گے اور کئی دہائیوں پر محیط دفاعی شراکت داری کو نئی تقویت ملے گی۔
طاہر اندرابی نے کہا کہ پاکستان اور کویت معاہدے کی تمام شقوں پر عمل درآمد کے لیے قریبی تعاون جاری رکھیں گے تاکہ باہمی اعتماد، مشترکہ مفادات اور مضبوط ادارہ جاتی روابط پر مبنی تعلقات مزید مستحکم ہو سکیں۔
انہوں نے اس امید کا اظہار بھی کیا کہ دفاعی تعاون میں اضافہ خطے میں امن، سلامتی اور استحکام کے فروغ میں مثبت کردار ادا کرے گا۔
پاکستان اور کویت کے درمیان دفاعی تعاون کا یہ معاہدہ جون دو ہزار تئیس میں اعلیٰ سطحی دوطرفہ ملاقاتوں کے دوران طے پایا تھا، جن کا مقصد دونوں ممالک کے درمیان سکیورٹی تعاون کو مزید وسعت دینا تھا۔
