غزہ میں اسرائیلی حملوں میں مزید 47 فلسطینیوں کو شہید کر دیا گیا ۔ دوسری جانب سے لبنان میں اسرائیلی کے 4 فوجی مارے گئے۔
بیت لاھیہ میں اسرائیلی طیاروں کی بمباری سے شہید ہونے والوں میں خواتین اور بچے بھی شامل ہیں ۔
فلسطینی وزارت صحت کا کہنا ہے کہ شمالی غزہ میں اسرائیلی فوج کے محاصرے کے آغاز سے اب تک مرنے والوں کی تعداد تقریباً ایک ہزار تک پہنچ گئی ہے۔اسرائیل نے تین ہفتہ قبل شمالی غزہ کی پٹی پر ایک بڑے فضائی اور زمینی آپریشن کا آغاز کیا تھا۔
اسرائیل کا کہنا ہے کہ وہ حماس کے عسکریت پسندوں کے دوبارہ منظم ہونے کے بعد اس علاقے میں کارروائی کررہا ہے دوسری جانب اسرائیلی فوج نے اتوار کو علی ال صبح ایکس پر جاری بیان میں کہا کہ اسرائیلی فضائیہ نے ایک بار پھر غزہ کی پٹی میں “حماس کمانڈ سینٹر” پر حملہ کیا۔
دوسری جانب لبنان کے جنوبی علاقے میں حزب اللہ کے ساتھ جھڑپ میں اسرائیلی فوج کے 4 اہلکار ہلاک اور 14 زخمی ہو گئے۔ اسرائیلی میڈیا کے مطابق مارے گئے فوجیوں کی شناخت کمانڈر ربی ابراہم یوزف گولڈ برگ، ماسٹر سارجنٹ گیلاد ایلمالیچ، امیت چیت اور میجر الیاف امرام کے ناموں سے ہوئی۔
اسرائیلی فوج کی جانب سے کہا گیا ہے کہ حزب اللہ سے جھڑپ میں 14 اہلکار زخمی بھی ہوئے جن میں سے 5 کی حالت انتہائی تشویشناک ہے۔
