پیر کی شام لاہور میں پنجاب اسمبلی کے اجلاس کے دوران 4480 ارب 700 ملین روپے کا مالی سال 2023-24 کا صوبائی بجٹ پیش کر دیا گیا۔
پنجاب کے وزیر خزانہ میاں مجتبیٰ شجاع الرحمان نے صوبائی بجٹ ایوان میں پیش کیا۔
اپنی بجٹ تقریر کے دوران وزیر خزانہ نے کہا کہ کل آمدنی کا تخمینہ 3331 ارب 700 ملین روپے لگایا گیا ہے۔ انہوں نے کہا کہ این ایف سی ایوارڈ کے تحت پنجاب کو وفاقی تقسیم شدہ پول سے 2706 ارب 400 ملین روپے ملیں گے۔
انہوں نے کہا کہ صوبائی محصولات کا تخمینہ 625 ارب 300 ملین روپے لگایا گیا ہے جو کہ گزشتہ مالی سال کے مقابلے میں 25 فیصد زیادہ ہے۔ ان میں سے پنجاب ریونیو اتھارٹی 240 ارب روپے، بورڈ آف ریونیو 99 ارب 200 ملین روپے جبکہ محکمہ ایکسائز 45 ارب 500 ملین روپے کی آمدنی حاصل کرے گا۔
پنجاب کے وزیر خزانہ نے کہا کہ 30 ارب روپے کے رمضان نگہبان کے تحت صوبے کی تاریخ میں پہلی بار مستحق خاندانوں کی دہلیز پر خصوصی پیکٹ پہنچائے جا رہے ہیں۔
انہوں نے کہا کہ لاہور میں پاکستان کے سب سے بڑے نواز شریف آئی ٹی سٹی کے لیے 10 ارب روپے جبکہ آئی ٹی انفراسٹرکچر سرمایہ کاری پروگرام کے لیے چار ارب روپے مختص کیے گئے ہیں۔ انہوں نے کہا کہ صوبائی ڈیٹا بیس اتھارٹی 500 ملین روپے کی لاگت سے قائم کی جا رہی ہے۔
انہوں نے کہا کہ تعلیم کے شعبے کے لیے مجموعی طور پر 595 ارب 80 کروڑ روپے مختص کیے گئے ہیں جو کل غیر ترقیاتی صوبائی بجٹ کا 26 فیصد بنتا ہے۔ انہوں نے کہا کہ نئی حکومت پانچ سالہ صحت ریفارمز پروگرام شروع کرنے جا رہی ہے اور رواں مالی سال کے دوران صحت کے شعبے کے لیے 473 ارب 620 ملین روپے کی گرانٹ مختص کی گئی ہے۔
وزیر خزانہ نے کہا کہ دیہی مراکز صحت اور بنیادی صحت کے یونٹس کی بہتری کے لیے چار اوور ہالنگ پروگرام شروع کیے گئے ہیں جن پر چالیس ارب روپے لاگت آئے گی۔ انہوں نے کہا کہ لاہور میں تیس ارب روپے کی لاگت سے نواز شریف انسٹی ٹیوٹ آف کینسر ٹریٹمنٹ اینڈ ریسرچ قائم کیا جا رہا ہے۔
انہوں نے کہا کہ صوبے بھر میں 80 سڑکوں اور شاہراہوں کی تعمیر و مرمت کا ایک عظیم الشان پروگرام ہے جس پر 320 ارب روپے خرچ کیے جائیں گے۔
Don’t forget to Subscribe our Youtube Channel & Press Bell Icon.
