اسلام آباد: آئی ایس پی آر نے منگل کے روز اعلان کیا ہے کہ پاکستان نے اپنے پہلے مقامی طور پر تیار کردہ “فاز” فضائی سے فضائی میزائل کا کامیا ب پروازی تجربہ کیا ہے، جو ملک کی ایرو اسپیس اور دفاعی صلاحیتوں میں ایک اہم پیش رفت ہے۔
پاک فوج کے شعبہ تعلقاتِ عامہ کے مطابق یہ میزائل جدید ترین ٹرمینل گائیڈنس سسٹم سے لیس ہے اور طویل فاصلے پر موجود فضائی اہداف کو نشانہ بنانے کی صلاحیت رکھتا ہے۔ اس صلاحیت سے پاکستان ایئر فورس کی آپریشنل لچک اور صلاحیتوں میں مزید اضافے کی توقع ہے۔
آئی ایس پی آر نے اس کامیاب تجربے کو پاکستان کی دفاعی صنعت کی تکنیکی پختگی، جدت طرازی اور بڑھتی ہوئی خود اتصاری کا ثبوت قرار دیا۔ میزائل کے تجربے کو پاکستان کی مسلح افواج کے سینئر افسران کے ساتھ ساتھ اس کی تیاری میں شامل سائنسدانوں اور انجینئرز نے بھی دیکھا۔
صدر مملکت آصف علی زرداری، وزیراعظم شہباز شریف، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، اور سروسز چیفس نے اس اہم کامیابی پر سائنسدانوں اور انجینئرز کو مبارکباد پیش کی ہے۔
اس کامیاب پروازی تجربے سے پاکستان کی مجموعی دفاعی پوزیشن کو مضبوط بنانے اور پاکستان ایئر فورس کی آپریشنل صلاحیتوں کو مزید جلا بخشنے کی توقع ہے۔ یہ اقدام ملکی دفاعی نظام کی ترقی میں مقامی سائنسی اور انجینئرنگ کی مہارت کے کردار کو بھی اجاگر کرتا ہے۔
اعلامیے میں میزائل کی رینج، رفتار، جہازوں کے ساتھ مطابقت یا اسے فورسز میں شامل کرنے کے وقت سے متعلق مزید تکنیکی تفصیلات فراہم نہیں کی گئی ہیں۔
