پیٹرولیم مصنوعات کی قیمتوں میں فی لیٹر پچپن روپے کے بڑے اضافے کے بعد ملک بھر میں ٹرانسپورٹ کرایوں میں بیس فیصد تک اضافہ کر دیا گیا ہے۔ بس سروسز، نجی ٹیکسیوں، رکشوں، مال بردار گاڑیوں، پاکستان ریلوے اور فضائی کمپنیوں نے بھی کرایوں میں اضافہ کر دیا ہے۔
ایک سروے کے مطابق اسلام آباد سے لاہور جانے والی بسوں کے کرائے میں تین سو سے چھ سو روپے تک اضافہ ہوا ہے۔ اسکائی ویز سمیت عام بس سروسز کا کرایہ سترہ سو سے بڑھ کر اکیس سو روپے ہو گیا جبکہ فیصل موورز نے اسے دو ہزار پچاس سے بڑھا کر چھبیس سو روپے کر دیا۔ اسلام آباد سے پشاور کا کرایہ آٹھ سو سے بڑھ کر ایک ہزار اور مظفرآباد کا کرایہ سات سو پچاس سے نو سو روپے ہو گیا۔
راولپنڈی اور اسلام آباد میں ٹیکسی اور رکشہ کرایوں میں بھی تقریباً بیس فیصد اضافہ ہوا ہے۔ پاکستان ریلوے نے بھی ڈیزل مہنگا ہونے کے بعد مسافر اور مال برداری کے کرایوں میں اضافہ کرنے کا اعلان کیا ہے۔
